Siglir tar il cuntegn
cuntegn

Grischun Central Ils ritgs duain spendrar la plazza da golf Alvagni

Ils davos set onns ha il club da golf Alvagni adina scrit cifras cotschnas. La raschun è ch’adina pli paucas persunas visitan la plazza da golf. Cun in’offensiva che sa drizza a persunas bainstantas, vul il club vegnir or da la crisa.

Sco quai che Hans Christoffel, il president dal cussegl d’administraziun da la Alvagni Bogn golfinvest SA ha ditg, saja l’existenza da la plazza da golf betg simpla. Il sport da golf haja probabel cuntanschì il zenit dal svilup, ed i vegnian vitiers mo paucs novs giugaders da golf. Alvagni saja en il lieu periferic, che na vegnia betg frequentà uschè bain sco auters gronds lieus da turissem. Sch’el n’avess ils davos onns betg surpiglià ils deficits annuals d’enfin 300’000 francs, alura fiss il club da golf oz bancrut, uschia Christoffel.

Servetsch «Premium» duai carmalar nova glieud

La nova purschida duai esser insatge spezial: «Betg mo la pussaivladad da vegnir ad Alvagni cun il helicopter duai procurar per attenziun, mabain er las novas prestaziuns», uschia Christoffel. Uschia veglian ins cun il nov servetsch «Premium» porscher insatge spezial. Per quels che pajan ina taxa annuala da 11’250 francs per persuna u ina taxa dal di da 370 francs datti per exempel parcadis reservads, l’auto vegn lavà ed i dat ina tschaina. Era tut quai ch’i dovra per giugar golf saja inclus, per exempel er il vehichel electric per circular sin la plazza da golf. Plinavant po il giast visitar senza supplement il bogn Alvagni. Bain saja il pretsch trais giadas uschè aut sco la taxa «Greenfee» usitada, ma las diversas prestaziuns per il giast valian bler dapli, è Christoffel persvadì.

RR actualitad 08:00