20 expertas ed experts da la gastronomia èn s’inscuntrads al «Future Dialog 2019», nua ch’igl è vegnì discutà davart il cuschinar a moda persistenta. Il cuschinier Andreas Caminada ha per exempel ditg, ch'el nizzegia nua ch'i saja pussaivel adina products regiunals. Il mument derivian radund 75% enfin 80% dals products che vegnian elavurads or dal Grischun u da la Svizra.
In tema era en l’exteriur
Jorge Vallejo che maina in’ustaria a Mexico City ha ditg, ch’era en sia terra saja impurtant, da cuschinar cun products regiunals. I na fetschia per exempel betg senn d’importar frajas da la Spagna, sch’ellas creschian er en l’atgna terra. E sco ses collegas en Svizra, giaja er el regularmain sin ils bains da purs, per pudair sa persvader da la qualitad. En il Mexico derivia radund 95% dal nutriment or da l’agen pajais, ha ditg il cuschinier da prest 40 onns.
RR actualitad 17:00