Perquai ch'il terren sut ils binaris era sa dischlocà, aveva la Viafier retica stuì interrumper il manaschi sin quest tschancun. Pertutgadas da l'interrupziun dal traject èn cunzunt persunas ch'èn da viadi en Engiadina.
Lavurs da mantegniment
Las midadas dal terren han chaschunà grondas tensiuns sin ils binaris e defurmà quels, ha scrit la Viafier retica. Per schliar ils problems ha la RhB stuì cumenzar cun lavurs da mantegniment extraordinarias ch'eran atgnamain prevesidas pir l'avrigl.
In tunnel pudess schliar ils problems
Sco quai che Ralph Rechsteiner, manader da projects da la Viafier retica ha ditg envers RTR, speria la viafier ch’il tunnel da drenascha che vegnia il mument construì a Brinzauls, calmia en l’avegnir ils moviments en il terren. Cas cuntrari vegnia il mument examinada la pussaivladad da construir in tunnel per la via e la viafier. In studi davart la realisabladad saja vegnì fatg. Tecnicamain fissi pussaivel da construir in tunnel. Tenor il studi saja da quintar custs da bun ina mesa milliarda francs, ha Rechsteiner ditg.