Siglir tar il cuntegn
Inhalt

Grischun Central Intginas aclas en Val Faller betg cuntanschiblas sin via

Ina bova ch’è vegnida giu dal Piz Forbesch en Val Faller la mesemna saira, ha devastà ina punt. La lozza e crappa è sa derasada sin ina largezza da circa 100 meters. Intginas aclas entadim la Val Faller a Plang n’èn perquai il mument betg cuntantschiblas sur ina via.

Sco quai che Pascal Murbach, il manader dal servetsch forestal da la vischnanca Surses ha ditg envers RTR, stuessan dus giasts da vacanzas cun in auto bandunar la fin d’emna la Val Faller. Pertutgads èn era purs che na pon il mument betg traversar la bova cun lur maschinas agriculas.

I dovra lavurs da rumida

Tenor Murbach vegnan las lavurs da rumir a cuzzar radund duas emnas. Probabel stoppia anc vegnir siglientà in grond crap ch'è sa fermà pli ensi en la bova, quai per proteger ils lavurant che rumeschan la bova ed era per la segirtad dals peduns.

Adolf Poltera che maina la chamona da viandar Piz Platta ha ditg envers RTR, ch’igl haja gia pli baud dà bovas che sajan vegnidas giu dal Piz Forbesch. Ina bova da tala dimensiun n’haja el enfin oz però anc mai vesì. La bova è sa distatgada ier saira suenter in ferm temporal.

RR novitads 17:00