Siglir tar il cuntegn

Grischun Central La chascharia da Savognin vegn serrada

La chascharia da Savognin vegn serrada la fin da quest onn. Ils radund 2 milliuns liters latg ad onn surpiglia la Bergsenn SA vinavant. Il latg vegn da nov elavurà en la chascharia Surselva a Mustér.

Ina grafica che mussa il viadi ch'il latg dals purs da Savognin e conturn fa en l'avegnir.
Legenda: Prest 90 kilometers tras il chantun vegn il latg dals purs da Savognin transportà en l'avegnir. RTR

Luzi Steier, il president da la cooperativa Chascharia Savognin e conturn, ha confermà che la chascharia vegn serrada la fin da l'onn.

Cun quai che la Bergsenn SA surprenda vinavant ils radund 2 milliuns liters latg da Savognin e conturn ha stuì vegnir chattà in nov lieu dad elavuraziun. En in contract che vala enfin la fin dal 2017 è la chascharia Surselva a Mustèr s'obligada da far quai.

Mustér ha capacitad per il latg da Savognin

En la Sennaria Surselva SA a Mustér haja quai avunda capacitad per ils radund dus milliuns literss latg ad onn dals purs da Savognin, ha ditg Marcel Singer, il maina fatschenta da la Bergsenn SA. Actualmain vegn il latg anc elavurà en la chascharia a Savognin, ch’è en possess da la societad dals purs.

La Bergsenn SA è ina filiala da la Mifroma/Migros. En il Grischun producescha ella il mument chaschiel a Savognin ed a Mustér.

Avegnir intschert per la chascharia da Savognin

Per la cooperativa dals purs èsi per il mument betg cler, sche la chascharia resta serrada per adina. Entaifer la societad saja il tenor, da betg dar si la chascharia dad in di sin l’auter, ha ditg Luzi Steier.

RR novitads 17:00 / 08.07.2016 12:00