La chava da crappa ad Andeer po vegnir engrondida

Las reservas d'explotaziun dal crap tschertgà «granit d'Andeer» d'actualmain var anc 80'000 meters cubic, vegnan augmentadas da nov sin ca. 330'000 meters cubic. Quai scriva la regenza en ina communicaziun.

Vista ord l'aria sin la chava da crappa ad Andeer Bild in Lightbox öffnen.

Legenda da maletgs: 1'453 meters guaud ston vegnir runcads. Uffizi federal da topografia

La revisiun parziala da la planisaziun locala, concludida da la vischnanca d'Andeer ils 29 da mars 2017, è vegnida approvada da la regenza. Cun questa revisiun parziala stgaffescha la vischnanca d'Andeer las premissas per engrondir la chava da crappa existenta Cuolmet.

Per augmentar las reservas d'explotaziun sin circa 330'000 meters cubic, vegn il territori d'explotaziun extendì ensi vers la muntogna (nord) e fin al Rain posteriur (sid). Durant e suenter l'explotaziun da 20 fin 25 onns vegn l'areal puspè emplenì cun material. Il material per emplenir vegn ad esser schuber e deriva da stgavaments, da demoliziuns e da rumidas.

La recultivaziun da l'areal che suonda includa la reforestaziun e la construcziun d'in corridor per la selvaschina.

Emissiun tar quest artitgel