Siglir tar il cuntegn

Grischun Central La famiglia stat en il center da Savognin Turissem

La nova directura da Savognin Turissem Tanja Amacher è en uffizi dapi l’entschatta dal mais. Ina da sias finamiras è, da persequitar la strategia che vul promover la famiglia.

Dapi l'entschatta dal mais è Tanja Amacher en uffizi sco nova directura da Savognin Turissem.
Legenda: Tanja Amacher Dapi l'entschatta dal mais è Tanja Amacher en uffizi sco nova directura da Savognin Turissem. mad

En l’avegnir fa Savognin Turissem mo pli reclama en connex cun famiglias: “Quai na munta betg, che nus na vulain betg pli ils mountainbikers ed ils viandants, ma nus ans vulain focusar pli ferm sin famiglias”, di Tanja Amacher.

Far reclama en tut ils secturs, na saja ozendi betg pli pussibel. La nova directura posseda dapi 17 onns in’abitaziun da vacanzas a Cunter, ed enconuscha cun quai bain la val. Quai vesa ella sco avantatg per sia lavur dal mintgadi, ha ella ditg. Tge midadas ch’ella prevesa en l’avegnir, n’ha ella betg anc ditg, quai saja anc memia baud. Ella s’empermetta bler da la la collavuraziun cun Grischun vacanzas, ch’ha surpiglià in mandat da marketing da Savognin Turissem. Quai che pertutga la hotellaria, manegia Tanja Amacher, che Savognin haja anc grond potenzial: Gronda speranza ha ella, ch’il hotel ed il bogn al Lai Barnagn possia vegnir construì.