Sco quai che Hansjörg Ladurner (50) ch’è oriund dal Tirol dal Sid ha ditg envers RTR, saja fitg impurtant da savair da nua che ses products vegnian. Uschia saja impurtant per el, che las mangiativas na stoppian betg surmuntar gronds viadis, tge che saja fitg ecologic.
A Lain ha el affittà in toc terren nua ch’el planta tranter auter tartuffels, favatschas e graun. Arà vegn cun ils chavals, ed ils grauns vegnan suenter mieut en il vegl mulin dal museum da Zorten. L’onn passà haja quai dà 50 kilos farina che tanschia quasi per l’entir onn. La charn ch’il cuschinier premià dovra en si’ustaria a Lai, sa el savens exact da tge animal c’ella derivia: «Savens accumpogn jau in animal enfin tar la chasa da maz», di il cuschinier. Per el saja fitg impurtant da suenter era elavurar tut da l’animal. «Food waste» saja per el in «no-go».
