Bun 50 abitaziuns e plazzas da tgira vul la vischnanca da Vaz bajegiar a la via principala da Lai. Gist dasperas quest nov bajetg vul era la vischnanca burgaisa bajegiar 21 abitaziuns per seniors. Quellas duain remplazzar la chasa da tgira e da vegls Parc, che vegniss stgarpada giu. Cun in suler sutteran duain ils dus bajetgs vegnir colliads l’in cun l’auter.
Atgnamain vuleva la vischnanca burgaisa era decider davart in barat da terren cun la vischnanca politica la fin da mars, la decisiun è però vegnida spustada: Ins veglia l’emprim spetgar giu la decisiun da la vischnanca politica, hai gì num.
Trumpà da la vischnanca burgaisa
Sco quai che la vischnanca politica da Vaz ha plinavant ditg ch'ella saja dischillusiunada, che la radunanza da la vischnanca burgaisa d’avant in mais n’haja gnanc vulì sentir ils represchentants da la Oase Holding SA, che fiss previsa da manar il center per seniors.
La vischnanca politica vegnia ussa a giuditgar da nov la situaziun – e betg sco supponì annullar il project. Per il president communal da Vaz Aaron Moser è ina dumonda centrala: «Co pudain nus integrar las firmas da construcziun indigenas, che quellas survegnan tanta lavur sco pussaivel en il project?»La populaziun pudess probabel vegnir infurmada l'atun da quest onn, ha ditg il president communal da Vaz Aaron Moser.
RR novitads 06:00
