Lai na survegn nagin center naziunal da sport da naiv

Las prognosas per las finanzas federalas n’èn betg gist da colur rosa. En vista a quest fatg ha il Cussegl federal decis da sistir la planisaziun per in center naziunal da sport da naiv a Lai fin il 2023.

Laschar ir video «Nagin center da sport da naiv a Lai»

Nagin center da sport da naiv a Lai

2:58 min, Telesguard dals 26.5.2016

Ditg èsi vegnì discutà, uss datti ina decisiun concreta: Ils proxims onns na datti nagin center naziunal da sport da naiv a Lai. En vista a la situaziun disfavuraivla da las finanzas federalas ha il Cussegl federal decidì da sistir la planisaziun dal center naziunal fin l'onn 2023.

Trumpada da la decisiun dal Cussegl federal è Andrea Stadler dal Departament chantunal per educaziun e cultura che ha manà il project ils ultims quatter onns. Els sajan dentant vinavant persvadì che Lai fis il lieu ideal per in center naziunal da sport da naiv. La regenza grischuna vegnì a decider a sia sesida proxim mardi co ch’i duai ir vinavant.

La regenza federala ha fixà il rom per sviluppar la promoziun dal sport. Grond pais vegn dà al program «Giuventetgna e sport» ed il schlargiament da l'infrastructura dals centers a Magglingen e Tenero. Ils meds per la promoziun sportiva da la giuventetgna duain vegnir auzads, l’emprima giada il 2017 e quai per ulteriurs 10 milliuns francs.

RR novitads 15:00