Dapi il november 2019 mainan ils dus ospitals dal Center da Sanadad Savognin SA e da l’ospital da Tusaun communablamain il servetsch da salvament Grischun Central. Da las basas Savognin, Casti e Tusaun vegn provedì l’entira regiun dal Grischun Central. La dumonda è s’augmentada cuntinuadamain. L’onn 2021 èn vegnidas prestadas totalmain 1'530 acziuns. L'emprim quartal da l’onn 2022 èn las cifras s’augmentadas anc ina giada massivamain. Fitg bleras da las acziuns fan part da las vischnancas turisticas da Vaz e da Lantsch. Areguard quest fatg vegn ussa la situaziun da las basas reglada da nov per experiment. Uschia maina il servetsch da salvament Grischun Central ina basa a Lai. Quella fasa da test vegn realisada dals 15 da fanadur fin previsiblamain ils 16 d’october 2022. La basa da Casti vegn serrada ad interim.
Cun questa decisiun pon vegnir meglierads ils termins d’agid per las pazientas e per ils pazients e rinforzads l’entir sectur da sanadad en questa regiun, communitgescha l’organisaziun. La Val d’Alvra e la regiun fin Schmitten che tutgan medemamain a la regiun da provediment da la sanadad Viamala/Alvra vegnian provedidas vinavant en moda optimala tras la basa da 24h a Savognin e tras la nova basa da Lai. Vinavant haja il servetsch da salvament Grischun Central mess en funcziun l'entschatta fanadur 2022 in nov vehichel d’acziun per medis d’urgenza.
