Dumengia bun'ura è la Polizia chantunala vegnida infurmada ch'in um da 27 onns saja sparì. Quel aveva curt avant telefonà cun parents ed inditgà ch'el saja blessà. Tenor indicaziuns dals parents saja quel ì a spass. Il lieu exact n'haja betg pudì vegnir inditgà, perquai è vegnida instradada ina tschertga. Suenter radund duas uras ha in commember dal Salvament alpin chattà l'um sparì sutvart la via principala en in auto, scriva la polizia.
Resultà da las emprimas retschertgas è ch'il manischunz da l'auto è stà da viadi sin a via dal Güglia da Lai direcziun Lantsch. Sin traject guliv è l'auto vegnì da vart dretga encunter ina spunda directiva da la punt suandanta. L'auto è uschia vegnì auzà en l'aria ed è crudà en la profunditad e la senda da viandar sutvart. Il manischunz è vegnì blessà e l'auto è vegnì demolì cumplettamain.
Il Salvament alpin ha procurà per l'emprim agid da l'um. Cun il salvament dal Grischun central è l'um lura vegnì transportà en l'Ospital chantunal a Cuira. Ina prova da sang han ins era fatg cun l'um.