A Lantsch vegni a dar in cumbat d’elecziun per il post da president communal. En ina communicaziun da medias ha Peter Nadig (58) annunzià sia candidatura per las elecziuns dals 26 da settember. Peter Nadig è turnà avant dus onns a Lantsch, suenter esser stà ord raschuns da professiun a la Bassa ed en il exteriur. El vegn proponì da la gruppa VIVA Lantsch sco cuntercandidat a Simon Willi.
Simon Willi sa metta puspe a disposiziun. El è entrà il 2011 en uffizi, suenter ch'el aveva surpiglià ad interim l'uffizi da Renato Lenz ch'aveva demissiunà precedentamain.
Ulteriurs posts libers
La gruppaziun VIVA Lantsch crititgescha la communciaziun manglusa en vischnanca, e vuless porscher ina alternativa a la elecziuns. La gruppaziun tschertga il mument er autras persunas che fissan prontas da surpigliar in post da suprastanza, cunquai che Gabriela Ulber e Benedikt Cadalbert han demissiunà.
Per in post da suprastanza candidescha Daniel Ulber. Sia candidatura sajai enconuschenta, ha il chanzlist Ursin Fravi confermà envers RTR. Enfin ils 5 da settember pon vegnir fatg propostas.