Siglir tar il cuntegn
Inhalt

Grischun Central Lantsch decida dapli a l'urna

La vischnanca da Lantsch decida en il futur impurtantas fatschentas a l’urna. Il suveran da Lantsch ha acceptà la cuntraproposta da la suprastanza a l’iniziativa che vuleva votar per posta davart fatschentas da la vischnanca.

vista sin il vitg da Lantsch
Legenda: La radunanza communala ha sustegnì en tut ils puncts la suprastanza. RTR, Beat Jenal

La fin da mars è vegnida inoltrada l'iniziativa suttascritta da 66 persunas. Suenter che la suprastanza aveva preschentà ina cuntraproposta han ils iniziants retratg lur iniziativa en favur da questa cuntraproposta. La midada va en vigur sin l'emprim da schaner 2019.

Elecziuns cumplessivas

Ils da Lantsch han era gì da far las elecziuns cumplessivas per la perioda d'uffizi 2019 fin 2021. Da las 74 persunas preschentas han 60 reelegì Simon Willi sco president communal. Reelegids en la suprastanza communala èn Benedikt Cadalbert e Gabriela Ulber e da nov fan part al gremi Marianne Diebold-Caviezel e Corsin Durisch.

Plinavant han ils da Lantsch concedì tut ils credits dumandads. 90'000 francs en connex cun l’implant da glera «Bovas», 58'000 francs per mesiras da segirezza tar l'Arena da Biathlon ed in credit da 48'000 francs per lavurs da projectaziun per la pista per skis cun rodas.

RR novitads 10:00