Il president vertent – Simon Willi
Simon Willi di, ch’el haja era suenter 10 onns en uffizi sco president, anc adina gust da cuntinuar cun sia lavur. Lantsch haja gì in bun svilup. El haja plaschair vi da ses uffizi, ed i saja in basegn da sviluppar enavant la vischnanca. I saja da cuntinuar cun quai ch’ins haja entschet, surtut la planisaziun locala ed il svilup da l’Arena da biatlon. Il model cun ina direcziun communala vesa Willi sco buna via per distgargiar la lavur en suprastanza. Che Lantsch n’haja betg fatg part a la fusiun avant set onns cun la vischnanca Albula/Alvra vesa el sco buna decisiun. La vischnanca haja ina buna collavuraziun cun Vaz sco era cun Albula/Alvra. Il svilup da la vischnanca saja però grategià fitg bain enfin oz ed ins haja la grondezza e la fermezza da restar independent.
E pertge duess il suveran dar la vusch a Willi? El haja in bun mussament da prestaziun dals davos diesch onns, las finanzas sajan fitg bunas, ins haja ina creschientscha da la populaziun. Era bleras famiglias giuvnas sajan vegnidas ad abitar a Lantsch, quai grazia ad ina zona per indigens u la zona d’abitadi. Era in hotel nov e l’Arena da biatlon vesa il president actual sco plus da Lantsch.
Il concurrent – Peter Nadig
Peter Nadig vul tranter auter meglierar la communicaziun da la vischnanca, e la collavuraziun en suprastanza. El veglia far tut il pussaivel da carmalar dapli glieud a las radunanzas communalas, che sajan oz visitadas memia pauc. El saja in tip communicativ, in «teamplayer», el veglia meglierar la communicaziun che saja oz flaivla. Il model d’ina direcziun communala vesa el sco avantatg per il futur. Ed era Nadig vesa sco avantatg, che la vischnanca da Lantsch n’haja betg fusiunà. La finala stettia la vischnanca bain, ins stoppia però esser ina vischnanca activa en l’entira regiun. Economicamain ed emoziunalmain saja Lantsch probabel pli da manaivel a Vaz.
E pertge duess il suveran dar la vusch a Nadig? El stettia per cumpetenza, transparenza ed ina collavuraziun cun tuts, plinavant saja in’infurmaziun averta impurtanta, ha el ditg envers RTR. Sch’il suveran veglia in’alternativa tar il status quo, alura duess el dar la vusch ad el.
Per ils quatter posts en suprastanza communala candideschan:
- Armon Margreth
- Fabian Simeon
- Sheila Karrer
- Mark Piccaluga
- Daniel Ulber