Damian Dosch, il mainascola dal consorzi da scola Alvra Dafora dovra il mument blera pazienza ed anc bler dapli speranza. Per la scola primara rumantscha a Lantsch tschertga el ina persuna d'instrucziun surmirana.
Da chattar la persuna optimala para il mument dad esser ina sfida pli gronda. Quai haja dentant da far nagut cun l'idiom u rumantsch grischun, en general saja quai grev da chattar la persuna adequata, resumescha Damian Dosch.
D'ina vart saja la concurrenza da scolas en la Bassa ed en il territori Grischun tudestg in problem. Persunas d'instrucziun che han in diplom rumantsch han numnadamain diversas opziuns. Da l'autra vart sa Damian Dosch era chapir ch'ins vul suenter la scolaziun forsa betg gist surpigliar ina plazza e l'emprim far viadis e scuvrir il mund.