La vischnanca da Lantsch quinta cun in surpli per l'onn proxim. Il suveran ha approvà il budget 2022 che prevesa in surpli d'entradas da 63'500 francs – quai tar entradas da var 7,6 milliuns francs. Il pe da taglia resta a Lantsch tar 75% da la taglia chantunala simpla.
Plinavant ha la radunanza communala deliberà la revisiun parziala da la constituziun communala per la votaziun a l'urna. I va per introducir il model da direcziun communala – pia d'avair ina direcziun ch'è responsabla per la part operativa, ed ina suprastanza ch'è responsabla per la part strategica.