Igl è stà ina festa per pitschen e grond, cun divertiment per uffants, zoo da charsinar chauras e nursas – e schizunt cun il schluppet digital da biatlon po vegnir sajettà. Era muaglia han ins pudì contemplar lung d’in percurs davent da l’Arena da biatlon sin il prà nua che biatletas e biatlets cumbattan uschiglio per in plaz sin il podest.
Dumber da visitaders na cuntenta betg
Sco quai che Gian Michael, il president dal comité d’organisaziun da las festas d’Agrischa da Lantsch, Val Schons e Val Calanca ha ditg, na cuntentian las frequenzas betg. Magari haja quai da far cun la bell’aura, forsa sajan blers purs anc vi dal far rasdiv u fain, auters sajan forsa en lais per sa frestgentar. Ina raschun per il pitschen dumber da visitaders possia però era esser l’obligatori d’avair in test da corona u ina virola cunter corona, ha Gian Michael ditg. Tar l’entrada èsi numnadamain betg pussaivel da far in test. Tgi che n’ha nagin resultat negativ u n’è betg virolà, sto turnar a chasa.
Agrischa enfin dumengia saira
La dumengia è l’Agrischa a Lantsch ida a fin las 5 la saira. La finamira era d'avair 3'000 visitadras e visitaders, la fin finala eran quai lura be 1'000 persunas che han chattà la via en l'Agrischa a Lantsch .