Siglir tar il cuntegn

Header

audio
Lantsch sanescha vias er senza meglieraziun
Or da Actualitad dals 10.02.2020.
laschar ir. Durada: 03:07 minutas.
cuntegn

Grischun Central Lantsch sanescha vias senza meglieraziun

La stad dal 2016 ha la radunanza communala da Lantsch refusà in project da meglieraziun da 7,6 milliuns francs. La meglieraziun n’è nagin tema pli. La vischnanca cumenza ussa però a sanar vias senza subvenziuns.

Sco quai che Simon Willi, il president communal da Lansch ha ditg, dettia bleras vias che sajan en in nausch stadi. Perquai veglian ins ussa sanar vias ils proxims 10 fin 15 onns cun agens meds e senza subvenziuns. Uschia ins na stoppia era betg resguardar tschertas reglas che fissan prescrittas cun ina meglieraziun. Ins resguardia il NA dal suveran dal 2016, e giaja ussa questa via.

Pertutgant la cultivaziun dal funs sajan ils proprietaris dal terren ed ils purs sa cunvegnids, uschia che questa dumonda saja reglada bain. Dasper la renovaziun da vias datti anc ulteriurs puncts che la vischnanca da Lantsch vul reglar en l’avegnir. Per quest intent ha ella elavurà en collavuraziun cun l’uffizi d’agricultura e geoinfurmaziun il project «Planisaziun agricula», che resguarda era las dumondas da las alps ed il management da l’aua.

Ina schliaziun plitost nunusitada

Sco quai che l’Uffizi d’agricultura e geoinfurmaziun scriva sin dumonda da RTR, haja quai en il passà dà mo fitg paucs projects da meglieraziun che sajan vegnids refusads. En general na vegnian projects refusads betg pli persequitads enavant. Savens dettia tar projects da meglieraziun refusads ina planisaziun agricula che resguardia ils basegns da l’infrastructura agricula en ina vischnanca. E per quella planisaziun datti mintgamai ina subvenziun. A Lantsch hai dà per quella 60'000 francs dal chantun.

RTR actualitad 11:00

Dapli da Grischun Centralavrir la Landingpage

Nach links scrollen Nach rechts scrollen