Siglir tar il cuntegn

Header

Andeer decida sche las pendicularas da Spleia survegnan agid finanzial dal maun public.
Legenda: Andeer decida sche las pendicularas da Spleia survegnan agid finanzial dal maun public. RTR, F. Belotti
cuntegn

Grischun Central Las pendicularas da Spleia dovran agid - Andeer pudess gidar

Sco emprima vischnanca da Valragn e Schons decida Andeer da segnar aczias da las pendicularas da Spleia. Er ils votants e las votantas en la radunanza comunala dal venderdi ils 25 da november han da decider sche la vischnanca duai cumprar ils indrizs da far naiv.

Cun las pendicularas da Spleia vai mal. Ils ultims dus onns han ellas nudà ina perdita, quai resulta dal rapport da gestiun preschentà avant curt. Per vegnir or da la miseria propona il cussegl d'administraziun d'augmentar il chapital d'aczias per 1,3 milliuns sin maximalmain 3,9 milliuns francs e da surlaschar ils indrizs da far naiv a las vischnancas da la Valragn e Val Schons.

Participaziun da 200'000 francs

Andeer cun ses bunamain 1'000 abitants, la pi gronda vischnanca da la regiun, decida ussa da segnar aczias e da sa participar vi da la Schnee Infra SA cun 200'000 francs e da dar ina garanzia da 300'000 francs. Hans Andrea Fontana il president communal spetga discussiuns animadas, declera dentant er l'impurtanza turistica da la pendicularas per la regiun, per Andeer e la fin finala per il bogn d'Andeer.

Spleia decida pli tar davart il sustegn finanzial. Avess Spleia da dir na, fiss er in eventual gea d'Andeer obsolet.

RR actualitad 08:00