Gia sco uffant hajan ils geniturs gì giaglinas ed ella haja adina gì plaschair vi dad ellas, di Martina Bisaz ch’è fitg activa sin instagram. Ella haja schizunt ina giada mess in pignol en stalla ed haja festivà Nadal cun las giaglinas, sa regorda la dunna da Latsch cun in surrir vi da si’uffanza. Sur la pagina d’internet rettetdashuhn.ch haja ella survegnì duas giaglinas ch’eran memia veglias e fissan uschiglio vegnidas gasifitgadas.
In contract evitescha che giaglinas vegnan mazzadas
Ella chattia bun ch’i dettia organisaziuns che pussibiliteschan a privats da survegnir giaglinas che vegnissan normalmain mazzadas. En general vegnan giaglinas suenter in onn midadas perquai ch’i fan be pli paucs ovs. Glieud che piglia ina giaglina da la fundaziun Stinah ston suttascriver in contract. Tranter auter è prescrit che las giaglinas na pon betg vegnir mazzadas cura ch’i na fan nagins ovs pli.