Sco quai che Emanuela Genelin, suprastanta communala dal ressort turissem a Filisur ha ditg, veglian ins spetgar la decisiun da fusiun dal december, e pir suenter questa votaziun cuntinuar cun la lescha da turissem. Plinavant vegl'ins era spetgar sin ina decisiun da la dretgira administrativa dal chantun Grischun. Cunter la lescha da turissem da Flem-Laax-Falera hai dà differents recurs.
La nossa nova lescha da turissem sa basa sin in muster dal chantun, e sch’i vegn a dar midadas vi da quest muster pervi da la decisiun da la dretgira, alura stuessan era nus adattar la nossa lescha proponida
Cun avair dapli temp vegl'ins esser franc, che la lescha che va en votaziun saja confurma a las leschas, e la votaziun na stoppia betg vegnir repetida in mez onn pli tard.
Suprastanza na suonda betg il rapport da Wildhaber
Robert Wildhaber, il cussegliader da Filisur e Bravuogn, ha en ses rapport proponì, che la nova lescha da turissem duess ir en votaziun uschè spert sco pussaivel. I dettia bler da far, uschia stoppian bleras sendas da viandar vegnir mantegnidas, il bogn avert da Bravuogn saja vegnì en ils onns, ed era la via da scarsolar da Preda a Bravuogn custia.
Plinavant pudess ins cun la nova lescha generar entradas supplementaras d’almain 250’000 francs ad onn, cun autras entradas per exempel dal chantun u da la Viafier retica perfin enfin in mez milliun francs ad onn dapli. Ma era senza la nova lescha da turissem, stoppian Bravuogn e Filisur betg gist quintar dad ir bancrut. I saja mo la dumonda, tge prestaziuns e meglieraziuns ch’il turissem veglia, ha ditg Robert Wildhaber.
RR actualitad 06:00