Luzi Thomann, Vus avais ils davos mais gì ina buna invista en ils cudeschs ed en il manaschi dal Center da sanadad Savognin, sco represchentant d'ina gruppa d'interess per mantegnair l'ospital a Savognin. Avais stuì surpigliar il presidi dal cussegl d'administraziun?
Luzi Thomann: Na, jau n'hai insumma betg stuì surpigliar quest post. Suenter la votaziun per ils dus milliuns francs per il center da sanadad – e suenter ch'jau hai vis quant fitg ch'ils emploiads e las emploiadas stattan davos il center, n'hai jau prest gì nagin'autra pussaivladad che da dir Gea.
Danunder vegn quest engaschament per il center da sanadad?
Jau hai gì prest 30 onns ina firma en il Grischun ed en auters chantuns. Per mai era Parsonz, il Surses, adina in vegnir a chasa per chargiar las battarias. Jau sun persvadì che mintgin che viva en ina regiun ha era ina, duas giadas en sia vita da far insatge per la regiun. E quai è mia pussaivladad da dar enavos insatge.
La vischnanca ha dà questa primavaira a l'ospital dus milliuns francs à fond perdu, a l'ospital na vai betg bain, finanzialmain. A la fin dal quint paja adina il pajataglia il deficit. Èsi alura simpel d'esser il president dal cussegl d'administraziun?
Igl è ina gronda schanza ch'ins ha davostiers ils possessurs, e che quels èn pronts da dar ora daners per l'ospital. Da l'autra vart ston ins era dir ch'i na va betg mender al center da sanadad a Savognin che ad auters ospitals. Quai è ina tematica da la politica e dal sistem da sanadad che vegn adina pli char senza ch'ins dumogna da pajar las prestaziuns dals ospitals.
La vischnanca è l'acziunari grond dal center. Ella n'è betg pli direct en il cussegl d'administraziun – mabain cun in represchentant. Era il conflict d'interess uschè grond ch'ins ha stuì separar quai?
I n'è mai bun sch'insatgi ha si duas chapitschas. Sch'ins lavura en il cussegl d'administraziun alura èsi en emprima lingia da far quai ch'è bun per l'organisaziun è betg quai ch'è forsa il mument il meglier per l'acziunari. Jau crai ch'igl è ina fitg buna situaziun per ir vinavant. Jau crai che tuts han emprendì insatge. Da mia vart hai jau emprendì cun la lavur en il turissem ch'igl è d'avair pazienza e jau crai che la suprastanza ha emprendì da dar adatg da betg avair si duas chapitschas.
Luzi Thomann, vulain discurrer da Vossa persuna, da Voss engaschament per la regiun da Surses dals davos onns. Vus essas stads president dal turissem da Surses e dais giu quest post l'october che vegn. È quai stà in pas per avair avunda temp per il center da sanadad u n'havais simplamain betg pli gì gust sin turissem?
Na, igl è stà in process pli lung, jau fiss era stà pront da far tuts dus, perquai ch'jau hai era la peda per quai. Ma quai na leva la suprastanza betg e cunquai ch'igl è stà ina uschè clera decisiun tar la votaziun per il credit da dus milliuns francs per l'ospital – alura sun jau stà pront da dir Gea, jau fatsch il job dal president dal cussegl administrativ per il center da sanadad.
Tar il turissem han ins ina tscherta libertad da crear insatge, ins po esser innovativ ed empruvar ora insatge. Tar il sectur da sanadad n'è quai betg il cas. Qua datti blera reglamentaziun, bleras reglas e leschas. Tge vulais cuntanscher sco president dal cussegl d'administraziun?
Jau vi ch'ins studegia in zic sur l'ur dal taglier ora. Ch'ins vegn forsa in zic pli freh er en questa situaziun dal center da sanadad – natiralmain adina en il rom da las leschas. Da pensar pli fitg vi da l'economia, co ch'ins pudess far marschar insatge pli fitg. Quai è era qua ch'ils collavuraturs e las collavuraturas han signalisà d'esser pront da far.
È il proxim pass per Luzi Thoman da surpigliar in mandat politic?
Na, jau na crai betg. Jau crai ch'en la vita èn ins u impressari u politicher – perquai che la politica funcziunescha tut auter ch'in impressari. Sco impressari vulan ins far quai ch'è sin lunga vista bun ed endretg e quai n'è betg adina la via ch'ils partenaris u acziunaris din gist en l'emprim mument ch'i saja il dretg. Ma sch'ins vesa ch'i funcziunescha suenter 5 u 10 onns, lura è tuts che stattan davos la decisiun. E tar la politica èsi plitost da far da l'entschatta davent in cumpromiss che la glieud stat davostiers ed i na va betg en emprima lingia per quai ch'è endretg en 5 u 10 onns, mabain tar blers politichers è l'impurtant da vegnir reelegì anc ina giada.
Vus avais ditg ch'i spetgan grondas sfidas sin il post dal president dal cussegl d'administraziun. As legrais sin la lavur?
Gea, jau ma legrel fitg perquai ch'igl è propi insatge nov – e gea, igl è ina sfida, ma sche la glieud di suenter in pèr onns che quel n'ha betg fatg uschè schlet quai, alura sun era jau cuntent suenter.
Co che la strategia per il Center da sanadad Savognin vesa ora per il futur, declera Luzi Thomann: