Amez il temp da corona ha la vischnanca sviluppà sut la direcziun da Linda Netzer il maletg directiv 2030. La manadra da svilup dal lieu è stada surpraisa dal grond interess dad indigens e possessurs da chasas u abitaziuns da vacanzas, d'elavurar in tal maletg directiv.
La communicaziun sco fil cotschen
Per Linda Netzer è il maletg directiv la basa per il futur da Surses. En otg puncts vuless la vischnanca lavurar, e concretisar las ideas. Quels puncts èn l'administraziun e politica, turissem e temp liber, infrastructura publica e segirtad, abitar e furmar, economia e svilup, natira ed ambient, furmaziun e cultura ed anc fatgs socials e sanadad.
Ussa saja dumandada ina buna communicaziun averta e transparenta per ch'il maletg directiv na resti betg in tigher da palpiri. Uschia possia la populaziun da Surses vegnir integrada en in proxim pass en il svilup a favur da la val.