Manaschi da 24 uras per la segirezza sin las vias

La nova centrala da commando da l'uffizi da construcziun bassa dal Grischun procura cun ses manaschi durant 24 uras per la segirezza sin las vias naziunalas e chantunalas. Ils custs vegnan surpigliads cuminaivlamain da la Confederaziun e dal chantun.

Martin Jenal, il manader da tecnica da l'Uffizi da construcziun bassa declera tge che vegn fatg en la nova centrala a Tusaun. Bild in Lightbox öffnen.

Legenda da maletgs: Martin Jenal, il manader da tecnica da l'Uffizi da construcziun bassa declera tge che vegn fatg en la nova centrala. RTR, F. Belotti

En cas d'eveniments sustegna la centrala da commando la centrala d'acziuns da la polizia chantunala sco er ils pumpiers, tranter quels er il cumbat cunter donns San Bernardino.

Uschia pon las organisaziuns a glisch blaua sa fidar d'ina partenaria cumpetenta che surveglia ils sistems tecnics cumplexs dals tunnels e che adatta quels – en enclegientscha cun ils auters posts – a las pretensiuns situaziunalas respectivas.

Surveglianza permanenta

La centrala da commando ha duas plazzas da lavur ch'èn equipadas cun ils meds auxiliars ils pli moderns. Il sistem chantunal directiv permetta, ensemen cun la surveglianza cumplessiva da video da las vias e dals tunnels, als operaturs da la centrala da commando da survegliar permanentamain l'entira rait da vias dal chantun Grischun areguard la tecnica ed il mantegniment da las vias.