Siglir tar il cuntegn

Header

Bogn Alvagni.
Legenda: RTR, Federico Belotti
cuntegn

Mancanza da liquiditad Bogn Alvagni sto relaschar il persunal

La situaziun finanziala dal bogn Alvagni na permettia betg da reavrir il bogn da cura, scriva l'interpresa. Tut ils 17 impiegads survegnan perquai la desditga. Per il futur vegnan tschertgadas novas furmas da finanziaziun.

Il bogn ad Alvagni resta serrà per il mument. Sco quai che la Bogn Alvagni SA scriva en ina communicaziun, na saja la liquiditad dal bogn betg pli garantida. Perquai survegnian tut las 17 collavuraturas e collavuraturs la desditga sin la fin da matg. Per l’avegnir vegnian els ad examinar novas variantas da finanziaziun, ha l'interpresa annunzià.

Evitar in concurs

Cun spustar in’eventuala avertura dal bogn sin suenter che las mesiras da corona vegnian schluccadas, possian ins per il mument evitar ch’il bogn giaja concurs. La finamira saja anc adina da puspè pudair avrir il bogn. Ils discurs tranter la possessura la Christoffel Holding SA, la vischnanca Alvra ed il chantun, che marschian dapi il 2017, n’hajan enfin oz betg anc purtà ina soluziun cuntentaivla.

Vischnanca deplorescha

La vischnanca Albula/Alvra deplorescha, ch’il bogn termal d’Alvagni resta serrà ad interim, e che 17 persunas han survegnì la desditga pervi da problems finanzials. Daniel Albertin, il president communal di: «Nus deplorain mintga plazza che va a perder en la regiun, ma i na po betg esser che la vischnanca mantegna questas plazzas d’affars privats per tut pretsch».

Anc nagina cunvegna

Gia pli ditg saja la vischnanca gia en contractivas cun la Bogn Alvagni SA per guardar co ch’in agid pudess vesair ora, ma enfin oz senza success. Davos las culissas marschian contractivas en scrit, ma davart il cuntegn na datti naginas infurmaziuns. Ins saja sa cunvegnì sin ina cunvegna da silenzi. Sco quai che Daniel Albertin ha ditg plinavant, veglia la vischnanca Alvra proximamain s’inscuntrar cun ils acziunaris dal bogn.

RTR novitads 12:00

Artitgels legids il pli savens

Scrollar a sanestra Scrollar a dretga