Tranter ils giasts era tranter auter l'autura e perscrutadra da nutriment austriaca Hanni Rützler. Ella ha explitgà tge che stat davostiers e pertge che products locals e regiunals èn pli e pli tschertgads. Igl èn blers facturs ch'influenzeschan tals svilups en la societad: Tranter auter la bainstanza e la digitalisaziun che pussibilitescha a la glieud da tscherner, cumprar, empustar e sa fatschentar cun quai ch'ins veglia. Quai vala era per las pli differentas modas e manieras da sa nutrir. Guardà sur il temp ora saja lura sa mussà il suandant svilup:
- Pli baud eran tut ils products locals. I na deva nagut auter. I gieva per garantir il surviver cun quai ch'ins aveva a disposiziun.
- Lura è vegnì popular dad inditgar danunder che la rauba vegn. Quasi sco agiunta tar ina tschavera. Quai saja er stà il temp nua ch'ils recepts stevan per ina regiun: p. ex. la talgia viennaisa per Vienna/l'Austria u la turta da nusch per il Grischun.
- Cura ch'il commerzi grond ha er piglià si la regiunalitad sco argument hajan ins pensà ch'il tema saja passà per producents locals. Ma quels sco er cuschiniers ed auters sajan lura vegnids radicalmain enavos tar il local. Hajan tschertgà las ragischs, sviluppà vinavant recepts tradiziunals, creà raits tranter producents locals ed uschia attratg da nov l'attenziun, cun success.
Gastronomia che porscha cuschina internaziunala cun sgular en spezialitads da l'entir mund saja pli e pli pauc dumandada. Ozendi veglia la glieud savair nua ch'els èn e tge che vegn mangià là. Pia culinarica en il context da cultura e tradiziun.
La sfida saja però da realisar quai uschia ch'i na daventia betg insatge per ina elita, mabain per in e scadin. Quai saja grev er perquai ch'igl è cunzunt all'entschatta pli char da producir e vender en il pitschen e local. Ma il giavisch saja qua.
La cuschiniera e pura da Lohn, Rebecca Clopath ha dà in'invista en sia lavur creativa cun products locals e biologics da l'agen bain puril a Lohn sin bun 1'600 m. s. m. Sia devisa è da lavurar cun ingredienzas che derivan dad uschè datiers sco pussaivel. Il sal saja il sulet che vegnia da pli lunsch e quai dal chantun Vad. Tranter auter sin ielis e spezarias dal lontan desista ella.
Tenor Rebecca Clopath èsi impurtant ch'ils indigens s'identificheschian cun la strategia «brutal local». Be lura possia quella fitgar pe e crescher. Ella fa l'exempel da l'ir cun skis en il turissem. La gronda part da las Grischunas ed ils Grischuns s'idetifitgeschian cun il sport da skis. Finamira fiss che quai gartegia era cun la gastronomia regiunala / locala.
E Joxe Mari Aizega ha explitgà co ch'il Pajais Basc en il nord da la Spagna è sa posiziunà sco regiun culinarica. El è manader dal Basque Culinary Center nua ch'i tutga er tiers ina facultad da las scienzas da gastronomia. L'exempel dal Pajais Basc mussa ch'igl è in lung process (passa 40 onns) da sa transfurmar d'in lieu sco blers auters cun ina cuschina e gastronomia internaziunala tar in lieu tschertga ed enconuschent per sia gastronomia che sa basa sin tradiziun, cultura indigena e products regiunals.
Plinavant ha el era mussà ch'ina vista totala sin la gastronomia sco sectur socioeconomic mainia al success. Latiers na tutgan betg mo il cuschinar ed il producir local, mabain era management, scienzas da nutriment, communicaziun (parter las experientschas e la savida) ed innovaziun.
Ord l'Archiv:
Gia l'avust da quest onn è vegnì preschentà il project «Enavant 4.0». Finamira dal project da la marca «Grischun» saja da promover il chantun sco lieu da lavur.
Il Telesguard ha accumpagnà la marca «Grischun» gia dapi l'entschatta:
RTR actualitad 17:00