Siglir tar il cuntegn

Header

cuntegn

Midadas Fundaziun Ospital Tusaun daventa «Sanadad Grischun Central»

La fundaziun Ospital Tusaun sa numna en l'avegnir «Sanadad Grischun Central». Quai han delegadas e delegads decidì. Questa midada fetschia senn, perquai che er la sparta Spitex, la pratica Spada ad Andeer e la pratica d'uffants Feldstrasse a Tusaun tutgian vitiers. Plinavant mainian ins ensemen cun il Center da Sanadad Savognin SA il «Salvament Grischun central». Che tut questas instituziuns sajan idas fin ussa sut il num Fundaziun Ospital Tusaun saja stà irritant e n'haja betg stgaffì identitad tar collavuraturas e collavuraturs. Per betg stuair midar il num da las marcas existentas, sajan ins sa decidì da crear ina nova marca tetgala.

Nova investiziun malgrà problems finanzials

L'ospital Tusaun ha fatg in deficit da passa 719'000 francs. Quai è dentant pli bass che l'onn passà nua ch'il deficit era tar passa 2,45 milliuns francs. La raschun per il deficit sajan pli paucs pazients e pazientas durant enviern pervia da restricziuns da la pandemia. La segunda mesadad da l'onn sajan las cifras puspè idas ensi. Era la Spitex ha fatg in deficit da passa 436'000 francs, malgrà dapli clients che l'onn passa. La raschun per la sperdita saja che clients intenstivs sajan crudads davent.

Malgrà ils deficits han ils delegads e las delegadas approvà in credit da 1,7 milliuns francs per il pachet d'investiziun «Intermediate Care». Quest pachet è per pazients e pazientas che dovran dapli controlla ma na dovran betg exnum ina tgira intensiva. Pervia d'auts dumbers da cas saja la refinanziazuin garantida.

La finanziaziun saja ils mais passads stada in grond tema. Dal 2003 fin il 2011 n'hajan las vischnancas betg tratg en 4,7 milliuns francs da contribuziuns d'investiziun. Quai è resultà en ina sutfinanziaziun. Las transchas da pajar enavos tractaments prestads ch'ins ha decidì avant trais onns, da radund 300'000 francs, sajan stadas memia bassas. A lunga vista hajan ins midà il sistem e quests daners duajan vegnir pajads enavos fin l'onn 2027.

RTR novitads 16:00

Artitgels legids il pli savens