Siglir tar il cuntegn

Grischun Central Mifroma visescha contract da fittanza

La Mifroma, la fittadina da la chascharia a Savognin, na prolunghescha betg il contract da fittanza cun la Societad da chascharia Savognin e conturn. Ella ha confermà ina novitad da La Pagina da Surmeir. Ils purs èn dischillusiunads.

Legenda: Guardar il video «Co va ì vinavant cun la chascharia a Savognin?». Durada 3:21 minutas.
Or da Telesguard dals 03.06.2016.

Sco quai che Marcel Singer, il mainafatschenta da la Bergsenn SA (ina societad affiliada da la Mifroma/Migros) ha ditg, na correspundia la chascharia da Savognin betg pli a las pretensiuns dad ozendi. Plinavant dettia quai blers disturbis era durant la producziun da chaschiel. Il contract da cumpra dal latg duai però valair vinavant. La Mifroma planiseschia d’elavurar il latg en la Sennaria Surselva a Mustér, nua ch’i haja anc avunda capacitads, uschia Marcel Singer. Cun ils emploiads sajan ins vidlonder da tschertgar schliaziuns.

In schoc per ils purs

Per ils purs è la decisiun da la Mifroma da betg prolungar il contract da fittanza in schoc. Sco quai che Luzi Steier, il president da la Societad da chascharia Savognin e conturn ha ditg, dettia quai anc quest venderdi ina radunanza, nua ch’ins veglia guardar co ch’i giaja vinavant. Tge che capitia ussa cun la renovaziun planisada da la chascharia a Savognin saja il mument intschert. La societad haja avant curt gì garantì la finanziaziun ed i mancavan mo pli paucs detagls, uschia Luzi Steier.

RR actualitad 18:00