Vuschs populisticas han proclamà la migraziun sco «Mamma da tut ils problems», la migraziun sco culpa da tut. Ils Dis da film mundial a Tusaun vesan quai auter, pli differenzià. Els decleran la migraziun sco «Mamma da blers buns films». Ella na saja betg mo il tema d’istorgias captivantas, tristas ed er ventiraivlas, scrivan ils organisaturs.
Il privilegi biografic d’avair access a differentas culturas fetschia che bleras auturas e blers cineasts sajan raquintaders particularmain talentads. Sulet uschia saja pussaivel che per exempel in Mongol, ch’è restà en Svizra pervia da l’amur e s’ha furmà a la Klubschule Migros al scenarist, mussa a Tusaun ussa l’emprim film lung da sia patria. Cun quai film ha el er gudagnà il premi dal festival da films a Shanghai.
Migraziun sco grond tema
Gist trais films dal program dals Dis dal film mundial sa fatschentan cun il tema «migraziun», che fa actualmain stremblir la cuntrada politica en l'Europa en ses fundaments. Uschia vegn tranter auter mussà il film da Markus Imhoof cun ses film documentar impressiunant «Eldorado». Per ses film ha Imhoof dastgà filmar sin ina bartga da la marina taliana durant l’acziun da salvament «mare nostrum».
Films da la China enfin en Svizra
«Human Flow» è il titel dal film da l'icona d’art chinaisa Ai Weiwei, che ha documentà moviments da migraziun sin e tranter ils differents continents. Il film svizzer «Fortuna» percunter raquinta ina istorgia d’amur fictiva ed intima, d’ina Etiopa, che chatta refugi en ina claustra da muntgs catolics en las stretgas da las alps cuvertas cun naiv.
Reschissur sin glista naira
In auter numnader communabel dals 28. Dis dal film mundial è il referiment sin il far films sez. «Khook», in film da l' Iran per exempel, raquinta dal reschissur Hasan, che na dastga betg pli far films perquai che ses num è sin la glista naira da l'organ da censura. Ma lura va enturn in assassin a Teheran, che stgavazza reschissurs però lascha viver Hasan. Pertge quai? El è bain il meglier da tuts? Ina cumedia schrega e nauscha, che neutralisescha tut las aspectativas vers il kino da l’Iran.
RR actualitad 17:00
