Siglir tar il cuntegn

Header

video
Il hotel Cube e las pendicularas Savognin
Or da Telesguard dals 01.10.2018.
laschar ir. Durada: 2 minutas 32 Secundas.
cuntegn

Grischun Central «Mintga nova entschatta è ina schanza»

Il hotel Cube a Savognin ch'ha serrà, è er stà tema a la radunanza da las Pendicularas da Savognin. La situaziun na para dentant betg dad esser dramatica. Mo 1.4% da la svieuta da las pendicularas derivia dals giasts dal Cube, ha ditg Markus Schröcksnadel, il president dal cussegl d’administraziun.

Tar ina svieuta da transport cun ina summa da 5.6 milliuns francs èn quai strusch 80’000 francs che las pendicularas han gì pervi dal Cube, mussa in sguard en il rapport da gestiun 2017/18. A la radunanza da sonda ha Markus Schröcksnadel ditg, che mintga nova entschatta possia era esser ina schanza. Avess il Cube dentant da vegnir vendì, na sajan las pendicularas probabel betg interessadas vi d’ina cumpra, ins haja gia avunda participaziuns en la parahotellaria.

audio
Bunura: Hotel Cube er tema da la radunanza da las pendiculars
ord Actualitad dals 01.10.2018.
laschar ir. Durada: 2 minutas 46 Secundas.

Anc nagin cas da dretgira

Davart ina dispita cun il possessur principal da l'hotel Cube Rudolf Tucek, na possian ins betg dir bler, uschia Schröcksnadel: «In cas da dretgira quai che pertutga in dabun da l'hotel Cube da las pendicularas n’è betg pendent, nus avain pajà tut ils quints». Las pendicularas vegnian dentant a pretender in pajament d’in debit da l'hotel Cube avant dretgira.

Savognin Turissem intermediescha

Las pendicularas na sajan dal reminent betg en contact cun Rudolf Tucek, per in discurs sajan ins dentant avert, ha ditg Schröcksnadel. Mesemna s’inscuntra il president da Savognin Beiva Alvra Turissem Daniel Fischer cun Tucek. L’intent saja dad intermediar, cun quai che Tucek fa diversas rinfatschas a divers adressats. La finamira principala saja, che l'hotel Cube possia puspè avrir la stagiun d’enviern, ha ditg Fischer ad RTR.

RR actualitad 07:00

Artitgels legids il pli savens