Siglir tar il cuntegn

Header

Il vitg da Tavau Monstein pudess daventar part dal Parc Ela.
Legenda: Il vitg da Tavau Monstein pudess daventar part dal Parc Ela. RTR, Federico Belotti
cuntegn

Grischun Central Monstein decida davart participaziun al Parc Ela

Il Parc Ela pudess daventar pli grond. Quest venderdi saira decida la fracziun da Tavau Monstein, sch’ella vul sa participar vi dal parc da natira. Actualmain è il Parc Ela vidlonder, da preparar ils contracts per la nova fasa da manaschi da diesch onns che cumenza l’onn 2022.

Actualmain vivan 5’500 persunas en il Parc Ela ch’ha ina surfatscha da circa 550 kilometers quadrats. Part dal parc da natira fan las vischnancas Alvra, Bravuogn-Filisur, Lantsch, Ferrera/Schmitten, Surses e Tagn/Wiesen, ina fracziun da Tavau. Dal cussegl pitschen da Tavau è ussa vegnida l’idea ch’era Monstein, che cunfinescha cun Tagn, pudess sa participar vi dal Parc Ela.

Suprastanza communala da Monstein è cunter parc

Avant curt ha il Parc Ela infurmà ils abitants da Monstein davart ils avantatgs dal Parc Ela. Paulo Giacometti il president da l’uniun purtadra Parc Ela ha ditg ch’i dettia signals positivs dal museum da miniers, da la bieraria e da l’uniun Pro Monstein. Cunter ina participaziun al Parc Ela è la suprastanza communala da Monstein.

Il Parc Ela è ina buna chaussa, ma il parc è plitost in svilup regiunal per la val d’Alvra ed il Surses, ma nus ans drizzain plitost vers Tavau e perquai pensain nus ch’igl è meglier da betg sa participar al parc.
Autur: Hans LaelyPresident communal Tavau Monstein
Hans Laely, president communal da Tavau Monstein.
Legenda: Hans Laely, president communal da Tavau Monstein. RTR, Federico Belotti

Sche la radunanza communala da Tavau Monstein decida da sa participar vi dal Parc Ela en l’avegnir, alura vegn quella decisiun consultativa dada enavant al «Kleiner Landrat» da Tavau. Quel vegnia ad acceptar la decisiun, ha confermà la vischnanca da Tavau envers RTR. En in proxim pass stuessan alura anc las autras vischnancas dal Parc Ela acceptar il nov commember. E sco davos – in act formal – stuess la Confederaziun anc approvar l’engrondiment dal parc.

RTR actualitad 12:00