Siglir tar il cuntegn

Header

audio
Muntogna da Schons: Marco Dolf resta president
Or da Actualitad dals 04.01.2024. Maletg: RTR
laschar ir. Durada: 3 minutas 33 Secundas.
cuntegn

Muntogna da Schons Marco Dolf resta tuttina president

En la Muntogna da Schons ha la radunanza communala da mesemna saira, ils 13 da december, reelegì il president communal vertent Marco Dolf. Quai scrivan las gasettas da Somedia. Dolf aveva demissiunà, ma cunquai ch'ins n'ha betg pudì chattar persunas che fissan stadas prontas da surpigliar l’uffizi, è el sa mess a disposiziun per in'ulteriura perioda d'uffizi.

Per mai èsi il pli impurtant ch’i va enavant bain cun la vischnanca, jau vuleva evitar ch’il chantun intervegn sch’ins n’ha betg in president; ensemen cun mia famiglia ed ils collegas en suprastanza sun jau vegnì tar la conclusiun da prolungar mes uffizi per in’ulteriura perioda d’uffizi da trais onns.
Autur: Marco Dolf President communal Muntogna da Schons

Marco Dolf è stà il 2021 l'emprim president da la vischnanca fusiunada. Avant è el stà president da Casti-Vargistagn. L'october ha el ditg a RTR che suenter passa 20 onns ch’el haja surpiglià responsablada saja el vegnì tar la conclusiun che quai tanschia.

Georg Podolak vegn nov suprastant

Auter ch’avant dus mais èsi dentant reussì da chattar in successur per il suprastant Marcel Cantieni che demissiunescha medemamain: La radunanza communala ha elegì Georg Podolak da Maton, ch'è stà l'unic ch'è sa mess a disposiziun. L’executiva è uschia cumpletta fin l’onn 2026.

Ustaria Orta a Lon vegn vendida

Medemamain ina segunda giada quest onn è la vendita da l’immobiglia Orta a Lon stada tractanda. Gia il zercladur è la vendita da l’ustaria en possess communal vegnida approvada. Ma lura hai dà – tenor il messadi da la radunanza communala – ina disditga da la cumpradra. Ins ha dentant pudì chattar novs interessents: ina famiglia da Favugn. Ella haja l’intenziun d’engrondir la purschida d’alloschament.

L’utilisaziun da la tualetta publica en chasa sco era la fermada da posta sajan vinavant garantids. La cumpra è colliada cun in'obligaziun da tegnair avert il restaurant per 10 onns.

Lon è ina da las fracziuns da la Muntogna da Schons.
Legenda: Lon è ina da las fracziuns da la Muntogna da Schons. RTR

Or da l'archiv:

audio
La Muntogna da Schons tschertga adumbatten in president
ord Actualitad dals 30.10.2023. Maletg: RTR
laschar ir. Durada: 4 minutas 6 Secundas.

RTR novitads

Artitgels legids il pli savens