Muntogna da Schons - Via provisorica per tschintg onns tranter Maton e Vargistagn

Il sviament provisoric che passa sur la bova ora duai restar per almain tschintg onns, di Christian Hartmann, il manader dal project da l’Uffizi da construcziun bassa. Ils custs per quest provisori muntan a circa 700'000 francs. A lunga vista dovria quai dentant ina meglra schliaziun, per exempel in’autra ruta da la via, in tunnel u ina punt che traversa il lieu da la bova.

Pli lungs viadis e pli pauca forza electrica

Tenor Marco Dolf, il president communal da la Muntogna da Schons, ha la serrada da la via diversas consequenzas. Uschia stoppian ils purs far in lung viadi per ir a far fain rasdiv – i dettia numnadamain divers purs da Vargistagn che hajan funs er a Maton. Quels ston prender la via da meglieraziun sur Casti e Donat. Il medem viadi ston far las persunas che vulan far cumissiuns en butia a Maton.

Las consequenzas da la bova s’accorschan er las Ovras electricas dal Rain Posteriur. Ellas n'hajan pliras emnas betg pudì producir electricitad cun la tschiffada d’aua dal Valtschiel. La bova saja ida giu fin en quest flum, uschia che la tschiffada d’aua na funcziunava betg pli sco giavischà.

Hotel ha pli paucs giasts

En il Hotel Capricorns mancan surtut ils giasts dal di. La fin d'emna hajan els enfin trais quarts pli paucs giasts, di la camariera e recepziunista Ruth Beer. L'affar cun giasts che stattan en il hotel marschian bain, malgrà ch’ils giasts stoppian vegnir sur la via stretga sur Casti a Vargistagn.

Pervi da la via serrada sto era l'Auto da Posta Svizzer adattar ses urari: Fin a Vargistagn curseschan per exempel mo bus pitschens empè d’in auto da posta, uschia che gruppas na pon il mument betg vegnir transportadas. A partir dal mument ch'il sviament è a fin, va era l'auto da posta puspè tenor urari e sin la ruta usitada.