Ils lieus da concert n'èn betg usitads: Il Bogn Alvagni ch'è serrà dapi tschintg onns, la chasa d'adempos Envia ni concertant per las vias dad Alvagni. Il festival è auter. Per Thomas Kollegger dal comité d'organisaziun è la finamira clera: Ins vul revitalisar la vischnanca dad Alvagni».
Nus vulain dar vita cun ils concerts ad Alvagni.
E che Noemi Schindler, ch'ha ina ferma relaziun persunala cun Alvagni, e Balz Homberger, il nov possessur dal Hotel Belfort, fan era part dal team saja in punct da partenza optimal. Schindler cun ses renum internaziunal sco violinista e Homberger sco gastronom e pedagog portan mintgamai differentas perspectiva en l'organisaziun. E quai saja in enritgiment.
Dapli vita per ed en vischnanca
Ils emprims fritgs da la revitalisaziun d'Alvagni cun il festival sa mussan gia ussa. Il Hotel Belfort ha in nov possessur e duess davantar in lieu era per auters concerts durant l'onn, di Kollegger. Ina finamira fiss era da revitalisar il Bogn Alvagni. Quai dovria dentant segir temp. Cun la famiglia Christoffel, la possessura da las localitads, ins haja dentant ina fitg buna collavuraziun, uschia ch'ins saja da buna speranza.