Il manaschi da la patinera da trais kilometers tranter Alvagni e Surava duai puspè vegnir activà. Sco proxim sto l'uniun dentant tschertgar ina nova presidenta u in nov president. Giorgio Bossi, il president da fin uss, dat giu ses uffizi per motivs da sanadad. Plinavant duai dar differentas novaziuns per che las pretensiuns da la vischnanca d'Alvra possian vegnir ademplidas: En discussiun stattan ulteriurs parcadis e novas construcziuns.
Per pudair garantir il manaschi dovra l'uniun dentant era schliaziuns quai che pertutga il persunal. Tranter auter duai vegnir examinà ina collavuraziun cun las uniuns turisticas u era las pendicularas. Ins tschertga persunas che pon lavurar radund 70 dis durant l'enviern. E lura duain era il pretsch d'entrada vegnir reponderà. I n'haja mai dà in augment dals pretschs, ni d'entrada ni per prender a tschains patinas, dapi il 2002.
Sche tut quai po vegnir organisà, duessi, tenor l'uniun, esser pussaivel d'avrir la Skateline da Nadal en in onn.
