Siglir tar il cuntegn

Header

cuntegn

Grischun Central Nagin candidat per executiva da Tusaun

Cun in inserat ha la vischnanca da Tusaun ensemen cun las partidas localas tschertgà ina candidata u in candidat per ina vacanza en la suprastanza communala, dentant senza success. Dapi che Curdin Capaul è daventà president communal l’avrigl da quest onn è ses post en suprastanza vacant.

Per distgargiar la suprastanza communala ch’ha il mument sis empè da set commembers è vegnida stgaffida ina nova plazza. Actualmain è Tusaun sin la tschertga d’in manader da la partiziun gestiun (Leiter Betriebe). Il nov post duess distgargiar la suprastanza communala en ils affars operativs.

2018 onn transitoric

L’emprim da schaner 2018 va en vigur la fusiun da las vischnancas Mut/Mutten e Tusaun. En la vischnanca fusiunada vala la constituziun communala actuala da Tusaun, la constituziun na vegn pia betg elavurada da nov.

Quatter represchentants da Mut

La nova vischnanca Tusaun funcziuna il 2018 cun la veglia suprastanza communala, vitiers vegnan represchentants da Mut per l'onn transitoric (René Frauenfelder sco suprastant, Jasmine Meier per il cussegl da scola, Florin Buchli per l’uffizi da construcziun, Luzia Pfleghart per la cumissiun da gestiun). Ils represchentants da Mut han las medemas cumpetenzas sco ils collegas da Tusaun. Il suprastant supplementar da Mut René Frauenfelder na surpiglia però nagin departament. Ils represchentants da Mut duain en l’emprim onn da fusiun purtar lur savida en la nova vischnanca fusiunada.

Elecziun il 2018

Il november 2018 èn lura las novas elecziuns per la perioda d’uffizi che cumenza il schaner 2019 e cuzza trais onns. Sco quai ch’il president communal da Tusaun Curdin Capaul ha ditg envers RTR, spera el che l’auter onn possian tut ils set posts en suprastanza communala vegnir occupads. En la nova perioda d’uffizi 2019-2021 ha la fracziun da Mut nagins sezs garantids en suprastanza da Tusaun.

Artitgels legids il pli savens