Siglir tar il cuntegn

Header

Visualisaziun dal project Lai Barnagn cun hotel, bogn ed abitaziuns da vacanzas.
Legenda: Visualisaziun dal project Lai Barnagn cun hotel, bogn ed abitaziuns da vacanzas. mad
cuntegn

Grischun Central Nagins recurs da muntada pli cunter project da turissem

Il project per construir in hotel cun bogn ed abitaziuns da vacanzas al Lai Barnagn a Savognin è in pass enavant. La recurrenta principala, l’Uniun Helvetia Nostra da la fundaziun Franz Weber, ha retratg ses recurs cunter las 96 abitaziuns da vacanzas.

Il concept che saja vegnì preschentà da la vischnanca da Savognin e dals investiders, haja persvadì, ha ditg Brigitt Wyss, la manadra da project da la Helvetia Nostra. Uschia possian per exempel ils possessurs da las abitaziuns da vacanzas mo ir 3 emnas a far vacanzas en l’atgna abitaziun durant la stagiun auta.

Il president communal da Savognin, Patric Vincenz, è cuntent, ch’ins saja vegnì da sa cunvegnir cun la Helvetia Nostra. Ed er ils auters recurs principals sajan ussa giud maisa, ha el confermà. I dettia sulet anc in pèr recurs cun pli pauca muntada, quels possia la suprastanza decider en atgna cumpetenza.

Patric Vincenz quinta, che la lubientscha da bajegiar possia vegnir dada en paucas emnas. Cun ils investiders ins saja en discurs, els hajan gì gronda pazienza per il project ch’è vegnì lantschà il zercladur 2013.