Siglir tar il cuntegn

Header

cuntegn

Grischun Central Nizzegiar turisticamain il lai da fermada da Sufers

Cun l’avertura da la terza etappa da la senda da viandar Tranter Spleia e Sufers è il project «Futur turistic Valragn» a fin. Vinavant duai ussa anc ir cun nizzegiar il potenzial turistic dal lai da fermada da Sufers.

Ils davos quatter onns èn vegnids elavurads divers projects en connex cun il studi davart il futur turistic da Valragn. En tut èn vegnids investids passa 300’000 francs. Vi da quels custs è sa participà il chantun e l’agid da Muntogna Svizzer cun var in terz.

La bilantscha dals purtaders da la politica, dal turissem e Parc Beverin è positiva. Uschia è per exempel vegnida fatga ina senda da viandar da Valragn a Sufers, il bigl da Valragn è vegnì inscenà, igl è vegnì elavurà in concept gastronomic regiunal cun il tema aua, igl ha dà in program d’impuls per abitaziuns da vacanzas ed igl èn vegnidas fatgas retschertgas en connex cun l’albiert per gruppas a Spleia. Sin la senda da viandar per lung dal Rain tranter Valragn e Sufers infurmeschan tavlas d’infurmaziun davart temas da l’aua, tranter Medels e Spleia datti infurmaziuns davart il traffic da transit, e tranter Spleia e Sufers vegn infurmà davart l’agricultura.

audio
Bunura: Nizzegiar meglier il lai da fermada da Sufers
ord Actualitad dals 18.05.2018.
laschar ir. Durada: 2 minutas 59 Secundas.

Nizzegiar turisticamain lai da Sufers

En connex cun il project «Futur turistic Valragn» è vegnì elavurà in studi davart la realisabladad da projects turistics en connex cun il lai da fermada da Sufers. Uschia prevesa quel da far in piogn da lain a la riva dal lai, nua che pestgaders pudessan fittar bartgas. Accessibel duess quai piogn vegnir tras in sutpassadi sut l’autostrada A13. Plinavant pudessi dar ina plazza da giugar ed ina plazza da campar per durmir en tendas en il liber. Il studi prevesa era da far in lai artifizial per ir a far bogn.

Suveran sto decider co vinavant

Sche tut vegniss realisà sco previs en il studi, alura fiss da quintar cun custs da radund 850’000 francs. Anc quest onn vul la radunanza communala da Sufers tractar il tema e guardar quant grond che l’interess per nizzegiar turisticamain il lai è.

RR actualitad 17:00

Artitgels legids il pli savens