Tgi che passa la via dal pass dal Gelgia cun l’auto ha franc gia vis la chasa gist sut il rempar dal lai da Marmorera. Igl è la chasa da camp da vacanzas Scalotta ed oriunda chasa da scola da Marmorera. A partir dal matg survegn il bajetg sco center per requirents d’asil ina nova funcziun. Il chantun ha prendì a tschains la chasa che tutga ad ina interpraisa da la Bassa per otg onns. Per l’emprima giada è uss la populaziun vegnida infurmada en chaussa.
Model da success cun centers maschadads
En il chantun Grischun hajan ils centers maschadads cumprovà che quels contribueschian ad ina atmosfera pli ruassaivla ed armonica. Entras la preschientscha da dunnas e famiglias saja il conturn pli equilibrà, accentuescha Edvin Demund da l’Uffizi da migraziun dal chantun Grischun.
Nus avain be centers maschadads. Lura èn quels pli ruassaivels.
Ils novs e las novas abitantas dal center a Marmorera enconuschan gia las reglas da cumportament che valan en talas instituziuns, cunquai ch’i han gia vivì en auters centers d’asil en il chantun. Er quai saja d’impurtanza per ch’ina buna convivenza funcziunia.
Infrastructura e locaziun
L'infrastructura a Marmorera saja adequata per las novas incumbensas. Il nov manader dal center d’asil Andri Netzer stima las belas grondas localitads u er ch’i ha bler spazi per s’inscuntrar e cuschinar.
Per noss diever è il Scalotta in dals megliers edifizis che nus avain a disposiziun.
Sco manco pudessan ins menziunar che la chasa è situada en la periferia. En quest reguard relativescha il manader dentant. Experientschas fatgas en auters centers hajan mussà che abitantas ed abitants sa disian svelt vid las novas circumstanzas e n’hajan betg bregia da s’orientar da nov.
Sfidas e collavuraziun cun la populaziun
Er sch’el sa legria d’avrir il nov center d’asil haja el respect. Pertge la collavuraziun cun la populaziun saja in factur ch’ins na possia mai prevesair ordavant. En il cas da Surses poi far surstar che l’interess per la saira d’infurmaziun è stà modest. Agitaziuns – sco quai ch’i aveva per exempel dà a Laax cura ch’il center aveva avert là – n’hai fin uss betg dà en il Surses. Tenor Andri Netzer hajan experientschas fatgas en autras vischnancas mussà che pregiudizis envers requirents d'asil sa dissolvan savens cun il temp e la glieud cumenza a vesair ch'ils abitants da questas abitaziuns n'èn betg criminals u laders. Andri Netzer spera che questas experientschas positivas vegnan a vegnir repetidas er a Marmorera.
Il nov center a Marmorera remplazza il Rustico a Laax che na stat dapi la fin da mars 2025 betg pli a disposiziun sco alloschi collectiv.
L’Uffizi per migraziun e dretg civil dal Grischun maina il center ed è responsabel per l’assistenza als requirents d’asil. La vischnanca è responsabla per incumbensas communalas sco il register d’abitants e la dismessa da rument. Vegnì enconuschent ch'i dat in nov center d'asil a Marmorea èsi l'october 2024.
Or da l'archiv: