Siglir tar il cuntegn

Header

cuntegn

Grischun Central Nov center da furmaziun a Savognin

Glindesdi decida la vischnanca da Surses sur d'in credit da 650'000 francs per la construcziun da la 'Stanza da gôt Lareschs' a Savognin. Tar la plazza da giugar duai vegnir construì in center da scolaziun, furmaziun, seminaris e divertiment.

audio
Mezdi: Chasa d'events en il guaud da lareschs Savognin
ord Actualitad dals 28.11.2016.
laschar ir. Durada: 2 minutas 50 Secundas.

La vischnanca da Surses ha l'intenziun da realisar il center en furma d’ina stanza da guaud. Il lieu persuenter è previs cunfinant cun la plazza da giugar 'Lareschs' a Savognin. La stanza è planisada en furma d’in bajetg funcziunal forestal e duess esser avert a las scolas da la val sco era a persunas privatas, firmas ed uniuns interessadas. Uschia è il project descrit en l’invit per la radunanza communala da glindesdi ils 28 da november. Plinavant duess il nov center esser adattà als basegns dal Parc Ela e Savognin turissem.

Tut laina indigena

Plinavant duess el esser ina plattafurma da reclama per las professiuns che lavuran cun laina. Il bajetg vegn construì exclusivamain cun laina massiva indigena e duess avair in caracter innovativ. Ina concurrenza d’architectura correspundenta è gia dada en incumbensa. Ils custs muntan senza mobigliar a 650’000 francs. Ins possia spetgar contribuziuns forestalas da ca. 80’000 enfin 100’000 francs. L’import exact n’è betg anc enconuschent.

Suenter che la concurrenza d’architectura è avat maun èsi previs, da dumandar fundaziuns, instituziuns e sponsurs pussaivels da sa participar finanzialmain al project. Ils custs da travagl annuals duessan vegnir cuverts cun dar a tschains las localitads. Sche tut va tenor plan, duess vegnir cumenzà cun las lavurs da construcziun la primavaira ed a fin duessan las lavurs esser vers l'atun.

RR actualitad 11:00

Artitgels legids il pli savens