Sco quai che Zegna Pittet-Dosch ha ditg haja ella avant in onn annunzià sia desditga. Dapi l’ura haja ella dumandà radund 30 persunas sch’ellas na veglian betg presidiar l’uniun, ma senza success. La fin finala ha ella chattà Gierina Michael, ch’è sa mussada pronta da parter il presidi. Questa soluziun vala per in onn. Suenter vegn Zegna Pittet-Dosch definitiv a sa retrair sco co-presidenta, ha ella ditg.
Era elegì la suprastanza
Plinavant èn vegnids elegids en la suprastanza da la URGC Giulia Riedhauser, Martin Decurtins e Rico Michael. Suppleanta è Petra Uffer e suppleant Marco Beeli. Gion Capeder n’ha betg pli candidà per la suprastanza. Cunquai ch’el è commember da la suprastanza da la Lia Rumantscha, po el dentant vinavant visitar las sedutas da la suprastanza da la URGC.
Promover il rumantsch
La URGC è ina societad affiliada da la Lia Rumantscha . Questa organisaziun è responsabla en il Grischun Central per la tgira e la promoziun dal rumantsch d’ina vart en Surmeir, ed era per la Sutselva cun la Val Schons, Muntogna e Tumleastga.
RR novitads 06:00