Nov'orientaziun dustanza d’ieli e chemia dal Grischun

A Tusaun èn vegnids preschentads trais camiuns novs dals pumpiers dal servetsch ABC. Plinavant è il dumber da basas vegnì reducì da 16 sin 10, scriva l’Assicuranza d’edifizis dal Grischun en ina communicaziun.

Quest nov vehichel da la Ems Chemie, duai era gidar a stizzar fieus ordaifer Domat, sch'i fa da basegns. Bild in Lightbox öffnen.

Legenda da maletgs: Quest nov vehichel da la Ems Chemie duai era gidar a stizzar fieus ordaifer Domat sch'i fa da basegn. RTR, F. Belotti

Ils territoris d'acziun da las 10 basas: En in cas d'havaria porschan las basas sustegn als pumpiers locals. Avrir maletg en lightbox.

Legenda da maletgs: Ils territoris d'acziun da las 10 basas: En in cas da havaria porschan las basas sustegn als pumpiers locals. GVG

En il rom da la nova strategia «Pumpiers 2015» è – ultra d'auters temas – er vegnida lantschada la reorganisaziun da la dustanza d'ieli e da chemia dal Grischun. En quest connex duain ils standards da prestaziun temporals vegnir adattads a las normas svizras e la dustanza actuala d'ieli e da chemia duai vegnir extendida al servetsch ABC dal Grischun.

Per quest intent han ins reducì il dumber da basas da 16 a 10 e fatg differentas adattaziuns persunalas e materialas. Oz èn vegnids surdads ils emprims trais vehichels ABC a la basa da la Ems-Chemie (basa principala) sco er a la basa da Tavau. Sis ulteriurs vehichels vegnan surdads ils proxims onns a las autras basas.

Basa da la Ems-Chemie

Ensemen cun ils pumpiers da manaschi da la Ems-Chemie maina l'Assicuranza d'edifizis dal Grischun (GVG) la basa principala ABC per il chantun Grischun. Dapi onns saja quai in partenadi ideal, scriva la GVG. Tuttas duas partidas possian profitar da questa collavuraziun. Ultra da pumpiers da manaschi cumpetents metta la Ems-Chemie er a disposiziun quatter da set spezialists da chemia per manar las basas da la GVG.

Basa da Tavau

Il vehichel per Tavau serva sco emprova da pilot per la nova flotta da vehichels. Sch'il vehichel è adattà, lura vegnan las set basas restantas medemamain equipadas ils proxims onns cun tals vehichels.

Tavau posseda plinavant in vehichel da sustegn dals pumpiers – er numnà roboter da stizzar fieu – che vegn duvrà cunzunt per stabiliments da traffic sut terra (garaschas sutterranas, tunnels e.u.v.). La GVG è sa participada cun 40% a la cumpra da quest vehichel. Tut tenor il success vegn decidì da cumprar in fin dus tals vehichels per il chantun.

Finanziaziun

La finanziaziun dal servetsch ABC GR stat sin trais pitgas:

  • 1/3 uffizi federal da vias/confederaziun
  • 1/3 uffizi per la natira e l'ambient (chantun GR)
  • 1/3 GVG

Ils novs vehichels ch’èn vegnids preschentads custan ca. 1,2 milliuns francs. La Ems-Chemie SA è sa participada cun ca. 1/3 a la cumpra da l'auto-cisterna grond.

RR actualitad 06:00