Siglir tar il cuntegn

Grischun Central Nova co-schefmedia per Savognin

Luwina Johanna Eichweber-Lammers è la nova co-schefmedia dal Center da Sanadad Savognin SA. La direcziun ha elegì ella sin l’emprim da settember da quest onn. Quai scriva il Center da Sanadad en ina communicaziun.

Luwina Johanna Eichweber-Lammers deriva da l'Ollanda e prenda dimora en il Surses.
Legenda: Luwina Johanna Eichweber-Lammers deriva da l'Ollanda e prenda dimora en il Surses. RTR, Federico Belotti

Luwina Johanna Eichweber-Lammers remplazza il medi Jaroslaw Pietraszkiewicz che banduna l’opspital da Savognin la fin d’avust. La nova media ha in pensum da 100%. Tranter auter è ella era responsabla per la scolaziun dals medis assistents.

Luwina Johanna Eichweber-Lammers ha studegià medischina interna generala ad Antwerpen ed Amsterdam ed ha fatg sia approvaziun e diplom professiunal en Germania. Ludwina Johanna Aichweber-Lammers ha 59 onns ed è maridada.

Ella discurra tudestg, hollandais, englais, franzos e talian. Ensemen cun ils medis da cader Stefano Corra e Martin Staritz vegn ella a manar il servetsch medicinal da l’ospital Savognin.