Bleras vischnancas dal chantun Grischun fan actualmain ina revisiun totala da la planisaziun locala per pudair concepir da nov zonas da construcziun e per impedir projects da construcziun nuncontrollads. En la vischnanca da Valragn è la nova planisaziun locala vegnida acceptada il december.
Igl èn planisads trais projects turistics a Spleia: in resort da vacanzas cun 500 letgs, ina nova plazza da campadi ed in alloschi per l’armada svizra che po vegnir duvrà l’enviern da sportistas e sportists. L’approvaziun tras la regenza grischuna succeda probabel fin la fin da quest onn.
Ultra da quai dovri ina revisiun parziala per fixar concretamain zonas da construcziun; la radunanza communala che decida surlunder è planisada sin la fin da l'onn. Tenor il president communal Christian Simmen pudessan las emprimas lavurs da construcziun cumenzar il pli baud l’onn 2028.