Ils indigens da Bravuogn e Filisur survegnan gratuit in bigliet per ir al festival da goa a Filisur. L'onn passà han radund 500 dals prest 950 abitants fatg diever da questa purschida. Quest onn èn gia radund 650 persunas stadas tar la vischnanca per in bigliet.
Sin ils radund 5'000 visitaders spetgads en tut, fa la populaziun indigena pia ora prest 10%.
Da stgars 950 abitants da Filisur Bravuogn van radund 650 a la festa da goa. Da differenziar ils indigens dals giasts da goa n'è betg fitg grev. Els guardan ora auter. Per exempel na portan els betg frisuras uschè extravagantas ed er la vestgadira è autra. Savens èn els da chattar enturn las bars, u nua ch'i dat insatge da mangiar.
L'art fascinescha ed igl è paschaivel
La raschun per far diever dal bigliet gratuit per ir al festival è tar mintgin differenta. Sabina Heinrich da Filisur giauda per exempel l'art ch'è da vesair durant il festival. Ma las drogas «diras» che vegnian consumadas, quai na saja betg bel da guardar.
Sco quai ch’il suprastant da Bravuogn Filisur Reto Bachmann ha ditg envers RTR, haja el gust ch'i marschia ina giada insatge «en il pitschen cumünet». Era la collavuraziun cun ils organisaturs saja fitg buna.
Marveglias da savair tge che capita
Wolfgang Schutz ha simplamain marveglias da guardar tge che curra e passa. I saja interessant da vesair ina giada insatge auter. Ed era sia emprendista Laurine Tschuor è il pli fascinada da vesair la glieud e co els sa vestgeschan e guardan ora.
«Vender glatsch è bun per l'affar»
Nicole Heinrich da Filisur venda ses glatsch ch'ella producescha sin ses affar puril durant la festa a Filisur. Ad ella fetschia plaschair da pudair striunar in surrir sin las fatschas dals goaners e dals indigens cura ch'els vegnan durant la festa per in glatsch. I saja paschaivel e fetschia plaschair ch'i marschia ina giada insatge.
«Igl è pli schuber che mintga open air»
In ch'è stà a tut ils tschintg festivals che han gi lieu fin uss è Dominic Oberli. Er ad el plascha ch'igl è uschè paschaivel ed er ch'igl è pli schuber che a mintga open air ch'el è fin ussa stà. La glieud saja paschaivla ed i haja ina bun'atmosfera.
Paschaivel è in pled che prest tut ils indigens dumandads al festival han numnà. L'atmosfera al festival da goa è insatge fitg spezial ch'ils indigens giaudan. Igl è ina festa che porta vita en la vischnanca che n'ha il rest da l'onn betg che passa uschè bler.
RR actualitad 07:00
