Siglir tar il cuntegn

Header

cuntegn

Grischun Central Origen cun hotel temporar e toc en halla d'ir a chaval

Il festival cultural Origen ha preschentà ses program da stad. Tranter auter datti in nov lieu da producziun en l’Engiadina ed in hotel temporar. Dasper set novas choreografias datti ina cumedia e dus miniaturas da teater.

Il program da stad d’Origen tematisescha la Russia e sa deditgescha a las relaziuns tranter il Grischun e la Russia. Giugà vegn er en la tur sin il Pass dal Güglia. L’entschatta fa in bal da benefizi cun Eno Peci, ch’è quest onn stà responsabel per la choreografia dal bal d’opera da Vienna. En tut preschenta Origen questa stad set novas choreografias cun solists da Vienna, Den Haag, Helsinki, Minca e St. Petersburg.

Quellas vegnan tranter auter preschentadas en il nov lieu da producziun en l'Engiadina: en la halla d’ir a chaval da San Murezzan - che stat sut la protecziun da monuments - sauta igl ballarin renumà da l'Ucraina Sergei Polunin il toc «Sacre de Printemps» che vegn interpretà da nov.

RR novitads 12:00

La halla d'ir a chaval istorica a San Murezzan.
Legenda: La halla d'ir a chaval istorica a San Murezzan. mad

La chasa Frisch sin la plazza da la vischnanca da Riom vegn transfurmada en in hotel temporar. Sco quai che Origen scriva en ina communicaziun, saja l’hotel in’albiert per giasts che na vulan nagin luxus, mabain giudair il scharm d’ina chasa veglia. Las stivas en l’emprima auzada vegnan nizzegiadas sco chombras ed en la stiva da laresch datti l'ensolver. En la veglia cuschina dal militar en il tschaler datti ina vinoteca ch’è averta il suentermezdi. Tut quai vala sco experiment: Dovra Riom in hotel?

La chasa Frisch a Riom.
Legenda: La chasa Frisch a Riom. mad

Las datas las pli impurtantas da la stad

  • 2 da zercladur: Avertura dal hotel, ils lavuratoris ed il biro da construcziun a Riom
  • 22 da zercladur: Avertura dad exposiziuns en il chastè, en sala da scola ed a Mulegns
  • 5 da fanadur: Bal da benefizi sin il Pass dal Güglia
  • 14 da fanadur: Avertura da la halla d’ir a chaval a San Murezzan
  • 25 da fanadur: Premiera dal gieu sut tschiel avert «Grand Riom Palace»
  • 5 d'avust: Premiera dals sautunz da Mariinsky en la tur dal Güglia
  • 18 d'avust: Surdada dal premi Wakker

RR novitads 12:00

Artitgels legids il pli savens