L'interess da star ina giada sisum la tur alva è grond. Dapli che 2'000 persunas han fin uss gia visità ina guida sin la tur da 30 meter autezza che vegn a restar per tschintg onns. Igl è in bajetg che para da fascinar.
La tur alva è il pli grond bajetg da l'entir mund ch'è vegnì construì cun elements ch'in roboter ha stampà.
Sco Anja Kubli, che fa las guidas sin la tur di, attira la tur persunas cun differents interess. Blers visitaders sajan interessads a l'architectura u lavurian en quest sectur, interessads a la cultura u persunas che passian per schabetg a Mulegns e hajan simplamain marveglias.
Actualmain sa prepara Origen sin l'enviern. Avant curt è la tur vegnida pachetada en cun ina sort blatga alva. Sco l'intendant da Origen Giovanni Netzer di, sajan els actualmain vi da planisar il program d'enviern. Il spazi da la tur è pitschen per eveniments culturals. Ma per Origen, che fa 220 preschentaziuns ad onn, duajan er avair lieu occurrenzas en il rom intim.
Magnet cultural malgrà sceptica
Da las paucas persunas en vischnanca na datti nagin che vuleva prender posiziun avant microfon e camera davart il svilup d'Origen. Intgins han reagì sceptic. Ina dunna ha ditg che Mulegns saja il fallà lieu per ina tur.
Fatg è: Mulegns è daventà in magnet turistic e cultural. La nova Fundaziun Origen quinta che fin la fin d'october vegnian fin a 30'000 persunas ad avair visità la pitschna vischnanca sursetra.