Siglir tar il cuntegn

Header

cuntegn

Grischun Central Origen posseda ussa era il hotel Liun a Mulegns

Suenter la cumpra da la Chas’Alva, ha la Nova Fundaziun Origen avant paucas emnas era cumprà il Hotel Liun. Venderdi saira ha l’intendant da Origen Giovanni Netzer, surpiglià las clavs da l’anteriura ustiera e cumproprietaria ed us dal hotel Donata Willi.

Durant l’enviern vul il festival cultural archivar ils documents vegls e magasinar la mobiglia veglia. La stad proxima duain lura vegnir sanà il tetg dal hotel che sa chatta tenor Giovanni Netzer en in nausch stadi, per part entria aua ed i saja da reagir spert, uschia l’intendant da Origen. La finamira a lunga vista saja dad etablir Mulegns sco lieu cultural. La finamira saja dad reavrir l’hotel l’onn 2021.

Lavurs da spustar Chas’Alva s'avanzan tenor plan

En il fratemp han gia cumenzà las lavurs da spustar la Cha’Alva, nua che la stretga tras Mulegns duai vegnir eliminada. Sco quai che Giovanni Netzer ha ditg, sajan gia vegnids allontanads ils palantschieus dals tschalers, ils fundaments sajan gia chavads, e las pitgas d’atschal che pussibiliteschan il spustament da la chasa sajan gia installads. Las lavurs s’avanzian tenor plan, spustar la chasa è planisà l’atun da l’auter onn. Tut las mesiras da renovaziun dal project «Spendrar Mulegns» che cumpiglian era la cumpra dal hotel e la Chas’Alva custan circa 5.6 milliuns francs. Anc manchian radund 800’000 francs, ha ditg Giovanni Netzer.

Preschentà nov cudesch dal hotel Liun

A l’occurenza da venderdi è plinavant vegnì preschentà il pli nov cudesch da Origen. L’istoricher Basil Vollenweider ha raquintà istorgias or dal cudesch «Post Hotel Löwe». Quel ha in cuntegn da 260 paginas e cumpiglia bleras fotografias veglias. Il cudesch raquinta da l’istorgia da construcziun dal hotel, dals transports da pli baud, e da l’anteriura famiglia possessura dal hotel Balzer. Ins vegn era ad enconuscher bleras persunas, ch’han pernottà en il hotel da tradiziun. En ina segunda part vegn preschentà il stan actual dal project «spendrar Mulegns».

RTR novitads 12:00