Origen surpiglia l’anteriura chasa communala da Riom

La Nova Fundaziun Origen cun l’intendant Giovanni Netzer vul schlargiar il festival. Perquai ha la fundaziun elavurà il project da svilup «Biro da planisaziun e svilup Origen 2020» a Riom. Per la realisaziun da quest project prenda Origen a fit l'anteriura chasa communala da Riom.

L'anteriura chasa communala da Riom. Bild in Lightbox öffnen.

Legenda da maletgs: L'anteriura chasa communala da Riom. RTR, Federico Belotti

Il president communal da Surses Leo Thomann explitgescha la valur dad Origen per la vallada. Avrir maletg en lightbox.

Legenda da maletgs: Il president communal da Surses Leo Thomann explitgescha la valur dad Origen per la vallada. RTR, Federico Belotti

La vischnanca da Surses surlascha ad Origen l'anteriura chasa communala per ils proxims 30 onns sin basa d’in contract da dretg da bajegiar. Quai ha decidì la radunanza communala da Surses cun 112 vuschs «gea» envers 8 vuschs «na». Il project da svilup dad Origen vegn sustegnì da l’uffizi per il svilup dal territori dal chantun Grischun. Er la vischnanca è pronta da sustegnair il festival Origen, sco impurtanta instituziun culturala da gronda muntada. Sin dumonda è la suprastanza sa declerada pronta da far cun la Nova Fundaziun Origen in contract da dretg da bajegiar per quest bajetg cun ina durada da 30 onns. Sco indemnisaziun è previs in tschains simbolic da CHF 1'000.- ad onn.

Vischnanca vesa potenzial

L’actuala parcella nr. 6063 cumpiglia era la via ed il bajetg da la posta veglia. En vista al contract da dretg da bajegiar per l’anteriura chasa communala, ha da vegnir constituida ina parcella da dretg da bajegiar, che vegn a cumpigliar ina surfatscha da circa 283m2. La suprastanza è da l’opiniun, ch’il diever da questa immobiglia communala entras Origen saja dal tuttafatg inditgada. La vischnanca da Riom è registrada en «l’Inventari federal dals lieus svizzers d’impurtanza naziunala degns da protecziun». Il concept dad Origen tegna quint dal mantegniment da quest maletg da vischnanca e promova quel en moda e maniera raschunaivla, ha la vischnanca scrit en il messadi.

RR novitads 07:00